Stanotte è nata 'na criatura.

L'aggio truvata ca chiagneva ancora

ca tremmava sana sana

e a stiento arrisciatava.

E' venuta all'intrasatto

senza tanta ammuina.

Nun ce credevo ancora

quanno l'aggio pigliata

chianu chiano.

Era troppo pe' mme

ca so' stato scippato 'e ogni bbene.

Nun sapevo che l'avev' 'a fà,

si 'a putevo tuccà.

Ma 'o core 'e onne luntane

c'annanza a 'sta criatura s'erano

addenucchiate

m'ha dato 'o curaggio

'e le cantà

doce doce

'a ninna nanna.

'A ninna nanna

'e 'na vita ca nun è 'o ccuntrario d' 'a morte,

'e 'na speranza ca nun è sulo dimane

'e 'nu  paraviso ca è fuoco eterno.

Pe'  ttramente,

'a notte s'arrischiararie,

'a luna s'era fatta sole

e tutt'attuorno

'e stelle s'erano allummate.

Allora, aggio capito

chi era chella criatura

accussì tennera e spauruta

c'aveva arrevutato

'a pace scuièta d' 'a vita mia.

Ire tu,

spuntata 'a miezz' 'o ggrano

'e turmiente antiche.