Nisciuno 'e nuie sapeva,

'e chist'ammore,

Nisciuno 'e nuie se vuleva bbene.

Eppure chella sera ,

all'intrasatto,

ce simmo arretruvate

'ncoppa a 'na strada sconosciuta

mane e mmane.

Chelli mmane parlaveno

sule lloro.

Chelli mmane astrigneveno

dduie core senza pate.

Chelli mmane

vasaveno 'a vocca d' 'o bbene,

bene rammariello.

M'appujaje 'ncopp' 'o pietto

ca te sbatteva

comme 'a ll'onne 'e 'nu mare

Sentette tutta 'a passione

'e femmena scuièta.

Te pigliaje 'a manella

comm'a 'na piccirella

e tutt'e dduie tremmanno

iettemo a ccarezzà

chill'uocchie,

fuoco ardente

ca nun s'è mmaje stutato,

fuoco ca scarfa

'o vierno 'e ogni core.

Chill'uocchie vasaje,

chill'uocchie me vasajeno

e me mettetteno 'mpietto

'a priezza 'e avè truvato 'ammore

tiènnero guaglione

ca corre e se ne fuje

senza sapè 'o pecchè.